وايتريسيتى – Wi-tricity

7.4.15



أكبر مشكلة بتقابلك كل يوم ع الأقل و إنت قاعد على الكمبيوتر, إنك تفصل أسلاك الكهرباء اللى عامله زى المكرونة الاسباجتى تحت رجلك, و بتحد من حركتك, و بتبقى مصدر قلق لأنها ممكن تكهرب حد, ده غير إنك بتتحول فار عشان توصل الشاحن فى الكوبس اللى فى المشترك اللى ورا المكتب عشان الفيشة فى مكان زنقة, و بتعمل فيها شيرلوك هولمز عشان تعرف مكان فيشة الشاشة من بين فيشة السماعات من كابل التليفزيون..

متضايق؟ إنت هتتبطر على النعمة! إنت تعرف إن البنية التحتية اللى مصروفة عشان توصل سلوك الكهرباء للبيوت من مصادرها تقدر بتريليونات !
طيب و لما تحب تتحرك بأى جهاز طبعًا هحتاج بطارية..
إنت تعرف قد إيه التكلفة اللى بتتدفع عشان نطلع طاقة 1 كيلو وات فى الساعة من البطاريات؟ مش مهم, بس هى أكتر بكتير من إنك تاخدها مباشرة من الكوبس, طيب تعرف إن كل سنة بيبقى فيه 40 مليار بطارية كمخلفات ؟

لو سألتك: عمرك فكرت قبل كده, ليه ماتكونش الكهرباء ده لاسلكية؟ هتخاف تتكهرب ؟
J
مع إن السلوك اللى حواليك فى كل حتة ده  هى اللى المفروض تخوف! هو إنت مش بتتأثر لما بتسمع عن كائنات رقيقة زى الفران اتكهربت, ده حتة المنطقة كلها بتقلب سواد مش عشان الفران ماتت, لكن عشان الحركة ده بتعمل قفلة ؟
 J

نقل الكهرباء لاسلكيا مش فكرة غريبة شوية, لأنها بتحصل تقريبا حواليك فى كل مكان..
معلومة ع السريع:
الكهرباء نوعين, الأول
DC – تيار مباشر – و التانى AC – تيار متردد-
اللى بيطلع من محطة التوليد بيكون النوع الثانى, و بيكون أفضل فى النقل لمسافات طويلة لأن مقاومته أقل فى سلوك الكهرباء, لكن فيه أجهزة فى البيت بتستخدم النوع الأول, مثلا لما بتحب تشحن المحمول, الشاحن بيحول الكهرباء لاسلكيا عن طريق ملفين واحد للـ
DC  و واحد للـ AC موجودين فى الشاحن نفسه مفصولين عن بعض بمسافة بسيطة جدًا بالميلى متر.
و اللى بيحصل إن الطاقة بتتنقل من ملف للتانى لاسلكيا على شكل موجات مغناطيسية.
معلومة على السريع:  العالم "تسلا" –من أكبر العلماء فى الكهرباء- كان عامل تصميم لمشروع لنقل الكهرباء لاسلكيا على مستوى مدينة, لكنه أحبط من اللى حوليه و المشروع ماتعملش –تخيل لو كان اتفذ, كان ممكن نبقى عاملين إزاى دلوقتى.

المهم, نشرة اليوم:مؤخراٌ قام مجموعة من الشباب تحت د. مارين بالبحث فى كيفية نقل الكهرباء لاسلكيا 
(Witricity) و قدروا إنهم ينقلوا الكهرباء للمبة 6 وات من مسافة 2 متر. ومع إن كفاءة النقل تقريبا النص, لكنا أفضل من نقل الكهربا من خلال البطارية, ده غير إن نقل الكهرباء المسافة ده يعتبر إنجاز.
و نجحوا كمان فى إنهم يعملوا كده مع التليفيزيونات و المحمول, و الكمبيوترات. كل اللى إنت محتاجه جهاز يتركب معاهم و محول لاسلكلى فى أى مكان فى البيت و هما هيقوموا بالواجب, و ياسلام لما يبقى عندك عربية بتشتغل بالكهرباء و تسيبها فى الجراج تشحن لوحدها لحد تانى يوم!


و بعكس ما يبدو من الفكرة, الـ
Witricity  آمان, لأن نقل الكهرباء فى صورة موجات مغناطيسية تقريبا مشابهة للى موجودة طبيعى فى الأرض و بنتعرض لها كل يوم, ده غير إنها هتوفر فلوس كتيـــــــر قوى بتدفع فى البنية التحتية و فى صناعة الكابلات نفسها.


طبعا عارفين إن نيوتن اكتشف نظرية الجاذبية لما شاف التفاحة بتقع من الشجرة, و فورد اخترع العجل المطاطى –الكاوتش- لأنه حلم بكابوس فيه عربية بعجل حديد بتكسر عظمه, و دكتور مارين جاتله فكرة الـ Witricity لأن تليفون مراته كان كل شوية بينبهه لأن البطارية فضيت وهو ماكانش عارف ينام, و كان بيفكر ليه مع كل الكهرباء اللى حوله فى كل مكان مفيش حاجة تشحن التليفون عشان يقدر ينام؟! من هنا جاتله الفكرة, و من هنا يثبت بالدليل القاطع أنه وراء كل رجل عظيم امرأة J

0 التعليقات:

إرسال تعليق

 
موهندس خانة © 2013 | Plantilla diseñada por Ciudad Blogger