هو احنا ليه كده ؟؟

28.1.15

هو احنا ليه كده ؟؟



فيه لحظات الواحد بيعيش فيها الدور ويسأل - هو احنا ليه كده ؟! - كمسلمين عامة يعنى, ليه حال كل بلادنا كده, وليه مافيش مكان فعلاً أو دولة يقدر يكون فيها مسلم كويس, ويكون فى وسط مجتمع كويس, بعيد عن فتن الدنيا, وبرضه بعيد عن المجانين اللى شايفين الدين محصور على رأيهم بس أو اللى مايعرفوش من الدين غير ازاى يسموا قبل ما يدبحوا البشر ..

فالأسئلة ده باسئلها لنفسى بس أنا فى الحقيقة بأكون موجه سؤالى لربنا بس بما إنى عارف إنى مقصر فباخاف أسأل مباشرة  بنفس مبدأ المحاضرة القديمة لو مش مذاكرها يبقى ماتسألش فى المحاضرة ده عشان الدكتور مايزنقكش .

ممكن يعدى عليك وقت تنسى السؤال وتعيش حياتك, بس فيه مرة هتلاقى لسبب ما اكتشفت ان المصحف محطوط على المكتب ونفسك تقراه, أو تلاقى واحد مش مسلم بيسألك سؤال فتضطر ترجع للمصحف وتقرا من كام آية 

بس المرة ده مش هتقرا القرآن -بسرعة كده قبل مانزل- وللا بمبدأ كله بثوابه, المرة ده  هتقراها وممكن ماتكملش, هتشوف وراها معنى واحد أو أكتر كدليل إنك عمرك كله قضيته من غير ما تفهم ربنا كان عايز منك ايه ! وإن الدين العظيم اللى انت بتفتخر قوى به انت عمرك ما اتعلمته صح, فوجود المجتمع والحياة اللى انت بتحلم بها واللى بتقرا عنها فى كتب التاريخ ممكن يكون سببها هو إن اللى يصلح لها عمره ما سعى إليها ..

وساعتها باحس إن ربنا بيقول لى ده الرد على سؤالك ! 

0 التعليقات:

إرسال تعليق

 
موهندس خانة © 2013 | Plantilla diseñada por Ciudad Blogger