ليه كده يا اتصالات .. ملعون أبو ده عشين جنى

18.1.15






ما جربتش قبل كده أعاكس حد فى التليفون بس لو بعاكس واحدة ما كنتش هكلمها قد ما كنت باكلم خدمة العملاء بتاعة اتصالات, دايماً البيانت بينزل عليها تعديلات ومش فاضيين, تقريبا النص مليون طفل اللى بيتزلط فى مصر فى الثانية بينزلوا بياناته على اتصلاته وبيسجلوا رقم باسمه, فباقى التسعين مليون يتفلقوا..



وساعات باتخيل مكالمتى مع اتصالات ممكن تكون كده :

- ألو .. أنا عمر يا حياتى, باكلمك من نفس الرقم اللى باكلمك منه كل يوم عشان نفس المشكلة .. ممكن يا حياتى لو مافيهاش رخامة أعرف أنا رصيدى اتشفط ليه مع إن شريحتى كانت ضايعة ؟! أرجو انى ما كنش باتكلم فى وقت مش مناسب ليكى ..ممكن تحاسبى الدليفرى وأنا على الخط !
- طب معلش يا بيبى مش هاقدر دلوقتى, أصل النظام بيتحدث 
- طب تحبى أكلمك امتى تانى ؟
- مش هاقدر أقول لك ..
- ليه التقل ده بس, ده انت فيه اتنين زيك ! أى نعم هما زبالة برضه بس اعملى بلقمتك 
- مش هاقدر والله أقول لك .. ممكن فى يوم 
- يا عينى
- فى شهر 
- يا سلام 
- فى سنــــة 
- أيوا بقى يا حليم 3> .


وبتستمر المكالمات الرومانسية ده شهور وشهور .. لحد ما تبقى من عاداتك اليومية انك تكلم اتصالات, وبقى روتين ممكن تعمله وانت بتلعب كاندى كراش, أو تتللك به لو انت عندك امتحانات وعايز تسيب المذاكرة,  أو وانت فى الحمام !

وبتكون فرصك فى الحصول على رد عدل, هو نفس فرصك فى الحصول على المليون جنيه فى الإعلانات السخيفة اللى بيذيعوا بينها لقطات من الأفلام .
" لو عندك مشكلة ومش عارف حلها, لو الاتصال بيقطع ومش عارف ليه, لو النت مش شغال مع إننا ساحبين رصيدك كله ,, اتصل على 300 من محمول وابقى قابلنا لو ردينا عليك .. "



فى مرة اتصلت بهم بعد 3 شهور يا مؤمن لقيتهم بيقولوا لى نفس المشكلة .. لكنى المرة زرجنت معاهم ونشفت دماغى ما انا قافل السكة .. الراجل كان ناقص يطلع من التليفون ويبوس دماغى ..
لحد ما قولت له خلاص, مش عايز أحل المشكلة بتاعتى, أنا عايز أقدم شكوى إنى كل ما أتصل تقولوا لى البيانات بتتحدث وماتردوش عليا .. ينفع أعمل كده آكبتن ..
سكت شوية وقال لى ينفع .. 




مشكلتى باختصار إن شريحتى كان ضايعة لمدة شهر وأنا مسافر ورجعت لقيت رصيدى تقريبا صفر, فكنت محتاج أعرف رصيدى راح فى ايه مش أكتر, من انعدام ثقتى فيهم تماما قولت لبسونى أى حاجة هبلة من اللى بيعملوها دايما عشان يسرقوا بها فلوسنا .

وبعد ما طلبت إنى أقدم شكوى, سبحان الله البيانات بدأت توحى إيه واحدة واحدة, وبعد ما كان مش شايف حاجة, اتكشف عنه الحجاب ورأي بعين المؤمن بياناتى عادى, بس كان لازم يحبكها ويقول لى مش كل البيانات قدامى كلمنى تانى وهنرد عليك ..
سألته عن اسمه , قال الاسم الأول بس , فسألته عن اسمه كامل عشان أعرف أراجع اللى هكلمه بعده -ده احنا صيع يابا -

قولت له هكلمك كمان ساعة من دلوقتى, وحصل ..

المرة ده كان كائن تانى غريب أكتر, - مع انه ولأول مرة فى التاريخ ما يجيبش سيرة تحديث البيانات- كان متحفز وكأنه داخل خناقة, لدرجة إنى قولت له صلى على النبى انت متضايق ليه O.o ؟!! #آه_وربنا
فى الآخر عرفت رصيدى  اتسحب فى إيه كانت حاجات أنا صرفتها فعلاً قبل ما الشريحة تضيع .. 

أى نعم علاقتى بالخط ما هى إلا استقبال مكالمات نادرة من مصر بما انى باستخدم النت على طول, لكن اتصالات دايما بتعاكسنى برسايل وغزل عفيف من عروض سخيفة 

وسؤال الحلقة هو ..
- ايه نوع الشركات اللى بيوصل عملاؤه للشك دايما فيهم إنهم حرامية ؟!!
- وليه ما بيجربوش ويندوز 98 , أعتقد هيكون أسهل وأسرع بكتير من النظام اللى شغالين عليه لتحديث البيانات ؟!!
- وليه الراجل المحترم اللى بيرد على مكالمات الناس مفكرنى باتصل أقلق منامه, أو أطلب حتة من السندوتش اللى معاه ؟ مع إنى زيي زيه والله وعندى مشكلة ويا بخت من فك كربة مؤمن ؟!!
- ما افتكرش انه هييجى حد فى خدمة العملا زى أحمد حلمى فى فيلم ظرف طارق 



#كلمنا_تانى #‏اتصالات_اسوأ_شبكة_في_مصر‬ #آحبيتى_آتصالات

0 التعليقات:

إرسال تعليق

 
موهندس خانة © 2013 | Plantilla diseñada por Ciudad Blogger