أمك اللى جايباها لك .. الجزء الأول

22.6.14

" انت حمـــــاررر ؟!" ده غالبا بيقى التعبير اللى بتكون عايزتوصله للى حوليك فى زحمة شوارع مصر, واللى من غير ماتاخد بالك (أو عامل مش واخد بالك) بيكون شعور متبادل, حتى لو كنت فان ديزل, هناك دائما من يتربص بك .. من ينظر إليك باشمئزاز ويحتقرك ودلوقتى بيجيب فى سيرة عيلتك واللى علمك السواقة واللى طلع لك رخصة والسبب بسيط فى نظره وفى نظرك احياناً للسواقة بلا مبالاة ولا مراعاة للغير كأنك مستبيع والسبب هو كما يقال بالعامية (أمك اللى جايبها لك)

السواقة فى دول كتير مش أزمة, ومش موضوع نتكلم عنه, هى مجرد وسيلة أسهل وأسرع لبلوغ المكان اللى عايز توصل له, والمفروض انها بتريح البنى آدم شوية وتسهل عليه عمله وحياته, لكن فى مصر بالذات -بسبب الزحمة- مش بس أزمة, وعطلة, ومشكلة يومية, حلها مش  مستحيل ولا صعب حتى ( لكنه غير مطروح حتى الآن ممكن الاخوة المسئولين مزنوقين هما كمان فى الطريق ومش عارفين يعملوا اجتماع يحلوا به المشكلة ده, مع انهم لو حلوها بمنطق سئيل رئيس جمهورية أنتيكا إنهم يخلوا الشوارع كلها اتجاه واحد عشان نهج م البلد هنخلص ) السواقة أصبحت حياة كاملة لكل واحد من أول ما يصحى من النوم, لحد مايرجع بيته شايل همها, بتخاف حد فى البيت يطلب منك تروح مكان تضطر تركب موصلة فيه ساعات كتييييير بتروح من عمرك وصحتك وأعصابك وهو مش بايدك تعمل أى حاجة. وعاجز تغير الواقع ده .

لكن بمبدأ مصائب قوم عند قوم فوائد, الزحمة ده بقت باب رزق لناس كتير زى بائعى المناديل والشحاتين وبائعى المخبوزات والسايسين وتجار الـ mp3 اللى بيشتغل على راديو العربية والاعلانات اللى فى الطرق, ومحطات الراديو اللى كترت مرة واحدة وتطبيقات المحمول اللى بتعرفك الزحمة فين -اللى هى تقريبا فى كل حتة- وانتهاء بدكاترة العظام والضغط والسكر والأمراض الصدرية والجراحين فى حالات الحوادث وقطاع الطرق وأمين الشرطة اللى هيتجوز كمان شهرين, وبياعين السجاير اللى هيشربها الباشا .... إلخ إلخ إلخ

وفى محاولة من العبد لله لتوثيق الأحداث الدامية اليومية اللى لو سمعها حد من الهيومان رايتس لاعتزلوا واستقالوا من هول ما سمعوا, أو لاستثمار وقت القارئ فى ما لا يفيد وهو بيقضى الكام ساعة اللى بيضيعوا كل يوم فى الزحمة, أو لتهوين الهم على كل واحد بيتحرق دمه من اللى بيسوقوا حوليه, وللى حوليه  :)


1- بداية القصة:

من لا شىء هتطق فى دماغك فكرة سواقة العربية, اللى عمرك ما فكرت أصلاً هى بتمشى إزاى, مفكرها بتمشى بالبركة وخلاص. العربية عبارة عن مفتاح وبنزين وفرامل وعجلة استبن. لو فكرت تتعلم السواقة اعرف ان ده وسوسة شيطان يا بنى بلاش تسمع كلامه, لكنه مش هيستسلم, هيفضل وراك لحد ما تتشجع وتقول لهم فى البيت .. انت حر,  هتقترح الفكرة عليهم ورد فعلهم فى البداية هو رد الفعل ضد أى تغيير: سيتجاهلونك, ثم يسخرون منك, ثم تنتصر, ثم تندم انك فتحت الموضوع أصلاً بس بعد فوات الأوان. هتفرح فى الأول  وتحس ان الموضوع سهل, لأنك هتتعلم قدام البيت أو فى مكان فاضى هتلاقى الموضوع سهل جداً فى الأول بالذات لما تكون منزل فرامل اليد عشان لما تدوس بنزين العربية تمشى, ولما تبقى على الأول مش التالت, وتقتنع ان الدبرياش ده له لازمة, وإن شاء الله ربنا ما يجيبش حوادث, بس حاول وانت ماشى ماتجيبش دراع الراجل بالمرايا, ولا تلبس العربية فى الحيطة وانت بترجع لورا والفيتيس على الرابع, ولا ملبس جنب العربية فى العمود وانت بتحاول تركن, والرصيف ده مش مكان العربية تهرش فيه جانبها بس ما تقلقش ده كلها كماليات فى العربية ! 

بس السواقة سهلة فعلاً لو اقتنعت انها مش سهلة زى ما كنت فاكر, ومش هتعرف تعمل كل حاجة من أول مرة, يعنى فى الأول تمشى على خط مستقيم بس, بعد كده تتطور سنة سنة, ومش لازم كل مرة تتلسع قفا عشان بتدور العربية وهى مش متمورة, حرام عليك قفاك ورم  .. وحوادثك هتقل بسرعة ماتقلقش بالذات لما الحاج يخليك تصلح العربية على حسابك .. وده النقطة اللى هيبدأ التردد يلعب فى دماغك ! بس هتلاقى الحاج عجبه الموضوع وبياخدك معاه مشاويره أهه منها بتريحه ومنها بتتعلم عشان تريحه أكتر (افتكر انى قلت لك بلاش) .

 هتحس بالمعاناة أكتر لما يعتمدوا عليك بشكل أساسى كسائق معتمد بشكل عرفى فى البيت, بقيت بتعرف تسوق يابنى, أبوك كان بيبقى فاضى زمان دلوقتى مش فاضى, يللا عشان تودينا أكتوبر .. أختك هتتأخر النهاردة (ييجى 4 العصر مثلاً) روح جيبها, فرح ابن خالة بنت عم مرات مش عارف مين بكرة, جدك يابنى .. إهىء ..  جدك الله يرحمه تعبان قوى, لازم نشوف قرايبنا يابنى مع نظرة استعطاف وأسى وخطبة عن صلة الرحم واستغلال الدين فى السواقة هيبدأ يظهر ! وانت بتكون ما بين فرحة التمكن من سواقة العربية وصدمة الطلبات ..
وعلى الجانب الآخر لما تملك الجرأة على طلب العربية, "بابا أنا هروح بالعربية أكتوبر" .. "ليـــــــــــــــــــه ؟!!" هيفتكروا ساعتها انك مش فاضى ووراك مذاكرة أو شغل, أو مشوار بيكون فى نفس الثانية اللى فيها معادك ... فنصيحة كده يا ابن الناس بلاش عشان تكون على نور, اشترى بتمن العربية تاكسى شغله وجيب من وراه فلوس, ولو حبيت تروح مشوار كلمه !




هناك 4 تعليقات:

  1. طيب انت كده دمرتلى احلامى انا لسه كنت بقول لبابا امبارح انت لازم تعلمنى ع العربيه بقى ع الطريق السريع -_-

    ردحذف
    الردود
    1. افتكرى انى قولت لك بلااااش :)

      حذف
  2. Loooooll so true wlahiii
    B7b eslopk l sa5er gdnn
    W geddak alah yr7mo t3ban :-D :-D

    ردحذف
  3. هايلة.. أسلوب سلس وعرض ساخر للتفاصيل.. برافو واستمر

    ردحذف

 
موهندس خانة © 2013 | Plantilla diseñada por Ciudad Blogger